Menningarsamstarf

Íslendingar munu vinna að því að endurskoða starfsáætlun norrænu menningarráðherranna, Norrænt menningarsamstarf við árþúsundamót - stefnumið, sem samþykkt var 1998. Einnig verður fylgt eftir starfi Svía við að endurskoða styrkjakerfi og uppbyggingu menningarsamstarfs. Haldið verður málþing um fyrirkomulag norræns menningarsamstarfs á vegum ráðherranefndarinnar þar sem endurskoðun á starfsáætlun menningarráðherranna verður á dagskrá. Jafnframt setur Ísland fram sín sjálfstæðu markmið:

Að nýta betur menningararfinn
Íslendingar munu beita sér fyrir því að auðsuppsprettan í fornbókmenntum Norðurlanda verði betur nýtt. Unnið er út frá þeirri hugmynd að þessi grunnþáttur í norrænum menningararfi geti verið aflvaki nútímamenningar. Sérstaklega ber þar að nefna norrænu goðafræðina sem er óumdeilanleg sameign þjóðanna. Efnt verður til ráðstefnu þar sem þessi málefni verða rædd.

Að vinna land í listum
Íslendingar leggja áherslu á að listamenn búa yfir andlegri auðlegð og eru skapandi, samfélagslegt afl. Listir eiga að njóta viðurkenningar sem nauðsyn í daglegu lífi fólks í stað þess að vera skrautfjöður á tyllidögum og aukageta. Þessi skoðun verður látin í ljósi með ýmsum hætti á formennskutímanum. Einnig verður hugað að því hvernig listin getur í senn sótt næringu til grasrótarinnar og frjóvgað hana. Í því skyni munu Íslendingar beita sér fyrir samstarfi listamanna og grasrótar, svo sem skapandi listrænu starfi með börnum. Ný tækni og þverfagleg viðhorf í listum skapa grunn að mögulegum landvinningum, innan og utan Norðurlanda, sem Íslendingar vilja greiða fyrir.

Að nýta atorku æskunnar
Samhliða því að samstarfsáætluninni Norðurlönd á leið inn í nýtt árþúsund verður framfylgt munu Íslendingar fylgja eftir áætluninni Ungir Norðurlandabúar – samstarf og fjölbreytni 2002-2006, þar sem barna- og unglingamenning er í brennidepli. Fylgt verður fjórum meginþáttum og unnið með fjölmenningu á Norðurlöndum, leiki og leikjahefðir, nýja fjölmiðla og tjáningarform barna og unglinga.

Að framleiða meira af stafrænu menningarefni
Íslendingar leggja mikla áherslu á að brúa hina svokölluðu stafrænu gjá, eða misgreiðan aðgang samfélagshópa að upplýsingum. Öflug stafræn menning hlýtur að vera markmið í upplýsingasamfélagi og því ber að nýta tæknina betur í nýsköpun. Lítil málsamfélög og þröngur markaður gera það hins vegar að verkum að ekki hefur skapast lífvænlegur jarðvegur til að framleiða stafrænt efni sem sprettur úr norrænum veruleika. Kannaður verður sá möguleiki að setja á fót norrænan margmiðlunarsjóð með það að markmiði að framleiða meira af norrænu menningarefni. Með slíkum sjóði mætti lyfta grettistaki.

Að kynna betur norræna menningu
Ekki er nóg að styrkja norrænt menningarsamstarf heldur þarf einnig að kynna betur norræna menningu og leita leiða til að samræma störf ráðherranefndarinnar á erlendum vettvangi. Á árinu verður sjónum beint að ríkjum á Balkanskaga og athugað hvernig megi efla enn frekar tengslin við Bretlandseyjar. Þá munu Íslendingar beita sér fyrir því að kannað verði hvaða möguleikar eru á að kynna norræna menningu í Japan í tengslum við heimssýninguna 2005. Stefnt er að því að efna til málþings í september 2004 um norrænar menningarkynningar.