Áætlun í samgöngumálum

Yfirlit

Flug og aðrar samgöngur á Vestur-Norðurlöndum
Á formennskutímanum verður unnin ítarleg greining á samgöngum á lofti og á sjó á milli Vestur-Norðurlanda og til þeirra. Markmiðið er að leggja grunn að stefnumótun fyrir stjórnmálamenn sem bera ábyrgð á samgöngumálum á svæðinu. Greiningin skal lögð fram á fundi samgönguráðherra Norðurlandanna sem haldinn verður á Íslandi í ágúst 2004.

Flugsamgöngur tengjast ekki síst uppbyggingu ferðaþjónustu í útnorðri og möguleikum þess að kynna Vestur-Norðurlönd sem einn áfangastað. Íslendingar ætla á vettvangi Norrænu ráðherranefndarinnar að hvetja til samstarfs og stuðnings um aukið frelsi í flugi innan alls svæðisins. Einnig skal stefnt að því að auka enn frekar norrænt samstarf við að mennta flugumferðarstjóra og skipstjórnendur.

Umferðaröryggismál
Umferðaröryggismálin eru eitt af mikilvægustu verkefnunum á vegum ráðherranefndarinnar um samgöngumál. Starfshópur vinnur að þessu verkefni. Markmiðið er að löndin skiptist á upplýsingum um umferðaröryggismál, m.a. til að læra af reynslu hvers annars og til að koma í veg fyrir tvíverknað. Íslendingar ætla að leggja mikla áherslu á öryggismál í samgöngum og beita sér fyrir því að framangreindur starfshópur taki fyrir öryggismál á sjó og í lofti, auk þeirra verkefna sem hann hefur fjallað um og snúa fyrst og fremst að umferðaröryggi á landi. Hópnum verður falið að finna leiðir til þess að auka öryggi á vegum, ekki síst í dreifðari byggðum landanna.

Samgöngur og upplýsingatækni
Íslendingar leggja til að fylgt verði eftir þeirri stefnu sem þegar liggur fyrir um upplýsingatækni og öryggi í samgöngum. Löndin hafa talið sig eiga ólíkra hagsmuna að gæta á þessu sviði en þó skal lögð áhersla á að samstarf og upplýsingagjöf rofni ekki heldur styrkist enn frekar öllum löndunum til hagsbóta.

Fjarskipti og upplýsingatækni
Íslendingar leggja áherslu á að Norðurlöndin starfi eftir stefnumótun sem þegar hefur verið gerð og nær til tímabilsins 2002-2004. Á árinu 2004 er jafnframt nauðsynlegt að hefja endurskoðun á þessari stefnu og gera aðgerðaráætlun til næstu fjögurra ára, enda er hér um að ræða málaflokk sem gefið hefur Norðurlöndum ákveðið forskot og mun móta framtíðarsamfélag okkar.

Ferðamál
Unnið verður að stefnumótun um menningartengda ferðaþjónustu. Það er gríðarlega víðfeðmt verkefni og hefur þegar verið unnið mikið starf á ýmsum sviðum nátengdu því. Það er því nauðsynlegt að afmarka verkefnið við sameiginlega þætti úr menningu Norðurlandanna, í fortíð, nútíð og framtíð. Einnig verður lögð áhersla á frekari vinnu við að mót stefnu um sjálfbæra ferðaþjónustu á norðurskautssvæðum og að hrinda í framkvæmd aðgerðaráætlun. Þá skal stefnt að því að tryggja að Norðurlöndin verði í fararbroddi við að skapa hreyfihömluðum gott aðgengi á ferðamannastöðum.

Siglingamál
Íslendingar leggja áherslu á öryggi sjófarenda á Norður-Atlantshafi og öðrum hafsvæðum sem að Norðurlöndum liggja. Brýnt er að mótuð verði norræn stefna á þessu sviði fyrir árin 2005-2010 og að fyrstu drög að henni liggi fyrir í lok ársins 2004.

Nauðsynlegt er að skipta öryggissvæðum á Norður-Atlantshafi á milli landa og ákveða mörk leitar og björgunar. Á formennskuári Íslendinga skal hafist handa við að skilgreina þessi mörk og gera áætlun um skiptingu eftirlits í tengslum við verkefni um vaktstöð siglinga.

Samantekt

Íslendingar ætla að leggja áherslu á öryggi í samgöngum og munu á breiðum grundvelli velta upp spurningum um öryggi til sjós og lands. Vinnuhópi verður falið að gera tillögur um aukið öryggi á vegum, ekki síst í dreifðum byggðum.

Íslendingar ætla að beita sér fyrir því að unnin verði nákvæm greining á samgöngum innan vestnorræna svæðisins. Einnig verður metin staða og þörf á samgöngum til og frá svæðinu.

Íslendingar ætla í norræna ráðherraráðinu að hvetja til samstarfs og styða aukið frelsi í flugi um vestnorræna svæðið.

Innan fjarskipta- og upplýsingatækni munu Norðurlöndin starfa eftir þeirri stefnumótun sem þegar liggur fyrir og gildir fyrir árin 2002-2004. Á árinu 2004 er nauðsynlegt að huga að endurskoðun þessarar stefnu.

Stuðlað skal að stefnumótun í menningartengdri ferðaþjónustu. Nauðsynlegt er að afmarka verkefnið við sameiginlega þætti í norrænni menningu. Einnig verður lögð áhersla á frekari stefnumótun um sjálfbæra ferðaþjónustu á norðurskautssvæðinu og sett af stað aðgerðaráætlun.

Stefnt er að því að Norðurlönd verði í farabroddi við að skapa aðgengi fyrir hreyfihamlaða á ferðamannastöðum.

Á formennskutímanum leggur Ísland áherslu á öryggi sjófarenda á Norður-Atlandshafi og öðrum hafsvæðum sem að Norðurlöndum liggja. Brýnt er að hafin verði vinna við gerð norrænnar stefnumótunar á þessu sviði fyrir árin 2005-2010 og að fyrstu drög að henni liggi fyrir í lok ársins 2004.

Nauðsynlegt er að skipta öryggissvæðum á Norður-Atlandshafi á milli landa og ákveða þannig mörk leitar og björgunar. Á formennskutíma Íslendinga verður hafist handa við að skilgreina þessi mörk og gera áætlun um skiptingu eftirlits í tenglsum við verkefni um vaktstöð siglinga.